2015年8月12日 星期三

留給最愛豬仔的說話。。。。

親愛嘅豬仔,

你地好! 無名最近見個市風高浪急,發左D up 瘋,引來好多誤會,所以想澄清一下 : 

1. 無名批評嘅人都有一個共通點,就係無顧受眾風險,如火燎森下下推垃圾股當價值投資儲錢股,大手轟入燈爆而盡,或者欺凌弱小,如一位阿姨,下下怒摑,無名就怒摑返佢,原因只係無名生性多管閒事,唔想有人受無理損失或傷害。

2. 無名只係自說自話,亦無開名,只希望見文者好自思量,回頭是岸,無名無心破人飯碗,因為無名尊重每位要揾食嘅男人。但無名廢文反覆傳到豬仔之間,惹來大家討論,實屬好笑夾抵死!

3. 有說無名踩低人來抬高自己,無名實在罪過加抵死,理應自修三件以謝天下,無名無意踩人,更唔係要抬高自己,  無名其實覺得事主都好攪笑,實為散戶之福,但多口只因近期有網友向無名反映,所以忍唔住多口講幾句,無名寫Blog五年多來,從來自說自話,從無做宣傳,更無意上位,在財演界爭一日之長短,相反無名好努力地隱姓埋名,與高手見面影相都hide 面,更相都無張,有show face 節目都唔Do,  抬高自己之心可謂全無。所謂踩人,只係無名照觀察所得,有話直說,閒來廢up 而已。敬希見諒深山野人,目不識丁,讀得書少,未懂欣賞蝕住賺等絕技!  無某絕無踩低之意,但亦期望一睹蝕住賺,屙住食等神技!

3. 有謂無名唔抵得人靚仔,無名生來好命,自出娘胎都未曾比人話過丑樣, 讚多彈少,靚仔與否可謂各花入各眼,無名自少從未妒忌過人靚仔,財演當中亦未見過可以妒忌之靚仔,如此說法實屬無辜,亦甚好笑!

4. 有說無名無修養,無名雖然口賤,講口賤可謂講股界數一數二,此無他,只怪無名娘親,生得無名人頭豬腦,轉數較高,相與論者未逢敵手,四書五經,作詩填詞亦懂一二,但無名到今日都未有講過任何人一個名字,無名只有照Quote 一招半式如蝕住賺嘅絕技(一字無改) ,及對受重傷豬仔致以深切治療部式慰問,但對方已直指無名,所以無名要澄清,無名廢up 只為提醒可救的豬仔,減少損失,但被開名指責,到底邊個無修養先?唔通自己講睇法都唔可以?無名亦公開接受批評,有批評都一定以實質証據辯明,何來無修養可言? 無名乃一界武夫,與人口角常見,但無名每次都以技術性擊倒,甚少以粗口對待,直至對方自知無位可入,自動收皮。相反講人無修養者對反對者粗口橫飛,屢見不鮮已。請勿將修養同駡人技巧混為一談,濟公酒肉穿腸過,佛祖心中留。

5. 有說無名小氣,無名R頭R"計",遍尋不獲,無名受過不少批評,亦睇錯無數次,但有錯都有認,及絕不不了了之,輸左就話"牛仔在夢中安然離去", 如果批評就係小氣,咁世上重有公平?批評亦都係對事不對人,無名早前未言一句,但見近期大市反覆,時有中招,屙煙後再屙煙,底褲輸完一條又當第條,全部有根有據,只對事不對人,無名先發此言,為的不是唔抵得人,無名老實講在股界見高手無數,未曾見過一位要唔抵得,敬重的高手有如肥熊,劍仙,Kenny 兄,女俠者等,但對方並未在此列,並非講渣,只係由心直講,要講唔抵得,只為唔抵得有人輸錢,是故無某忍到今日先出聲,只因無名父親自少教無名,路見不平拔刀相助,父親教誨,不敢不從!

6. 有說爭Fans屎,無名從未在FB賣過廣告,相又無張,平日對Fan屎留言都少答(Sorry, 太忙), 更無玩一tag三, 勾三搭四等game,相對對家的customer service, 言多必覆,對重傷者加以慰問,公關功夫到家,無名自懺形愧,愧對Fan屎,自家廚房蕃薯不理,有何爭Fan屎可言?

7. 最後無名見留言後終於明白大自然生態定律,無名無力改造品種,DNA中注定了獵食者與被食者的位置,無名其實連想救都多餘,被食者都死得安樂,活得開心!請原諒無名天真的想法!無名fan屎們亦無謂多言,生有時,死有時,天地之芻狗不仁!一言已盡之已!

無名死性難改,無名只想施主為豬仔著想,少D屙煙,少D當底褲,咁無名就自當收皮,做其忍屎忍尿忍仕! 如有冒犯,敬希見諒!無名再自修三件以謝施主普渡眾生!

敬祝食得安心,屙得順, 食住屙,屙住食,腸胃通!

無名劍
www.facebook.com/nonamesword

沒有留言:

張貼留言